ತಳಮಳದ ವ್ಯಾಧಿ

ಏನೋ ತಳಮಳ, ಅದೇನೋ ಗೊಂದಲ
ಮನೆಯಲ್ಲೇ ಇದ್ದರೂ ಎಲ್ಲರೂ ದೂರ ದೂರ
ಕೇಳಿದ್ದೆಲ್ಲ ಮಾಡಿ ಬಡಿಸಲು ಮಡದಿ ರೆಡಿ
ಕೇಳುವ ಹೇಳುವ ಸಂಭ್ರಮವಿಲ್ಲ ಮನಸಿನಡಿ

ಅಜ್ಞಾತ ಕಣ್ಣುಗಳು ನನ್ನನ್ನೇ ಅನುಸರಿಸುತಿದೆಯೇ
ಯಾವ ಕ್ಷಣದಲಿ ಹೇಗೆ ಇವನ ಬೇಟೆಯಾಡಲೆಂದೇ
ಹೊಸದಾಗಿ ಬಂದಿರುವ ಲೋಕದ ಹೊಸ ವ್ಯಾಧಿ
ಸದಾ ಚಿಂತೆ ನರಳಿಸುತ ಜೀವ ಪಡೆಯುವ ಹಾದಿ

ಬೇಡದ ರಜೆಯಲ್ಲಿ ಕೇಳುತಿದೆ ಬರೀ ಕಳೆದುಕೊಂಡ ಸುದ್ದಿ 

ಬೇಕಾದವರ ಸಾವು ಭಯ ಹುಟ್ಟಿಸುತ್ತಿದೆ ಮನವ ಗುದ್ದಿ 

ಸರತಿಯ ಸಾಲಲ್ಲಿ ಇರಬಹುದೇ ನಾನು ನನ್ನವರ ಹೆಸರು 

ಹಾಗೆಂಬ ಯೋಚನೆಯೇ ತೋರುವುದೇ ಮನದ ಕೆಸರು

ಜೀವನವು ಲೊಳಲೊಟ್ಟೆ ದಾಸವಾಣಿ ಹೇಳುತಿದೆ
ಎಂತೆಲ್ಲ ಅಧ್ಯಾತ್ಮ ವಿಚಾರಗಳು ಮನದಲಿ ಬರುತಿದೆ
ಬಂಧು ಮಿತ್ರರ ನಡುವೆ ಎಂದಿದ್ದರೂ ನೀನು ಒಂಟಿ
ಯಾವಾಗ ಕರೆದರೂ ಬರಬೇಕು ತಕ್ಷಣ ಹೊಂಟಿ

ಚಂದಿರನ ಕಂಡಿವೆವು ಕಾಣುವೆವು ನಾಳೆ ಮಂಗಳನ
ಎಂದವರು ಹೆಣಗಾಡುತಿಹರೇ ಎದುರಿಸಲು ಕೊರೋನ
ಎಲ್ಲಿ ಹೋಯಿತು ಎಲ್ಲವನು ಗೆಲ್ಲುವೆನೆಂಬ ಸಾಮರ್ಥ್ಯ
ಇರುವ ಭೂಮಿಯಲೆ ತಪ್ಪುತಿದೆಯೇ ನಮ್ಮ ಅಧಿಪತ್ಯ

ಅಣುಬಾಂಬಿನಲ್ಲೇ ಜಗವ ಗೆಲುವೆ ಎನ್ನುವ ಸಖನೇ
ಅಣುವೊಂದರ ಮೂಲ ತಿಳಿಯದೆ ಒದ್ದಾಡುತ್ತಿಹನೇ
ಎಲ್ಲಿ ಹೋಯಿತು ನಮ್ಮ ದಿಟ್ಟತನ ದರ್ಪ ಅಹಂಕಾರ
ದಾರಿ ತಿಳಿಯದೆ ಮುದುರಿ ಕುಳಿತಿಹುದೇ ಅಲಂಕಾರ

ಎಲ್ಲಿ ಹೋಯಿತು ನಮ್ಮಪಾಂಡಿತ್ಯ ಜ್ಞಾನ ವಿಜ್ಞಾನ
ನರರ ಸಂಹಾರ ತೋರಿಸುತಿದೆ ನಮ್ಮಯ ಅಜ್ಞಾನ
ನಾನಿರುವೆ ನಾ ನಿಮ್ಮ ಬದುಕಿಸುವೆ ಎನ್ನುವಾ ಮದ್ದು
ಇಲ್ಲದೆ ಪ್ರಾಣ ಮಲಗಿದೆ ಐಸಿಯುನಲಿ ಹೊದಿಕೆ ಹೊದ್ದು

ನಮ್ಮೆಲ್ಲರ ದುಷ್ಟ ಅಹಂಕಾರ ತೋರಿಸುತಿದೆ ಕನ್ನಡಿ
ಅಣಕಿಸಿ ಕೇಳುವ ನಗು ಆಗುವುದೇ ಏಳಿಗೆಯ ಮುನ್ನುಡಿ
ಯುದ್ಧ ಬಿಡುವೆ ಹಠವನ್ನು ಬಿಡುವೆ ಶತ್ರುತ್ವ ನಾ ಬಿಡುವೆ
ಬಂದಿರುವ ವ್ಯಾಧಿ ಕಳೆಯಲು ಸರ್ವ ಆಸೆಯ ಬಿಡುವೆ

ಶರಣಾದೆ ಶಕ್ತಿಯೇ ಲೋಕದ ಪ್ರಾಣ ಹರಣವ ನಿಲಿಸು
ಕರುಣೆಯ ತೋರಿ ಲೋಕ ಬಂದುಬಾಂಧವರ ಉಳಿಸು
ಶಿರಬಾಗಿ ಹೇಳುವೆನು ಇನ್ಮುಂದೆ ನಾಶಮಾಡೆನು ಪ್ರಕೃತಿ
ಮಾತು ಕೊಡುವೆನು ಬದುಕಲಿ ನಿಲ್ಲಿಸುವೆ ಎಲ್ಲ ವಿಕೃತಿ